LAOAG CITY – Inpakaammo ni Dr. Rodrigo Catcatan, mangidadaulo ti City Health Office ditoy siudad ti Laoag nga addan ti sumurok-kumurang 94% ti nabakunaan nga agtawen ti 9 agingga iti 14 nga ubbing ti Human papillomavirus vaccine wenno HPV ditoy siudad ti Laoag.
Segun kenkuana, naruay nga ubbing a babbai nga agtawen ti 9 agingga iti 14 ti nabenepisiaran ti libre a bakuna kontra iti cervical cancer.
Inbatadna a saan laeng a dagiti agad-adal nga ubbing ti pambubliko a pagadalan ditoy siudad ti nabenepisiaran no diket pakairamanan pay dagiti adda iti pribado a pagadalan.
Kunana nga agtultuloy ti pananggutigotda kadagiti nagannak babaen iti panangilawlawagda a naimbag kadagiti benepisio a maala dagiti annakda iti panagbakuna iti Human papillomavirus vaccine.
Innayonna a babaen iti panagpabakuna ti nasao a bakuna ket saan laeng a malapdan ti pannakaiyakar ti Human papillomavirus no diket masaluadan pay ti salun-at dagiti sumarsaruno nga henerasion.
