LAOAG CITY – Addan iti nasurok nga 400 a milyon a pisos ti nausar manipod iti 20 percent development fund ti gobierno probinsial iti umuna nga innem a bolan ita a 2024.
Segun kenni Engr. Pedro “Pete” Agcaoili, Provincial Planning and Development Officer iti kapitolyo probinsyal, ti kadakkelan ti nailatangan ti pondo ket iti benneg ti salun-at nga isu ti maysa kadagiti kangrunaan a programa ni Gob. Matthew J. Marcos Manotoc.
Inbatad ni Agcaoili nga iti laeng Gov. Roque Ablan Sr. Memorial Hospital ket nasuroken a 100-milyon a pisos ti nailatang.
Kunana a kaipapanan daytoy nga apagkapat ti pakabuklan ti 20 percent development fund ti probinsia ti naiyalukar iti nadakamat nga hospital.
Inlawlawagna a ti nasao a pundo ket mausar para iti operasyon ti ospital pakairaman ti pannakaipasdek dagiti pasilidad ken pannakagatang dagiti kagamitan.
Innayon pay ni Agcaoili a malaksid iti Gov. Roque Ablan Sr. Memorial Hospital ket maipaayan pay ti pundo dagiti nagduduma a District Hospital ditoy probinsia tapno napinpintas pay ti panangipaay da ti serbisio iti umili.
Naamoan a dagiti dadduma a paset ti pundo ket mausar iti pannakatagiben ti aglaw-law, agrikultura ken sabsabali pay.
