LAOAG CITY – Inpakaamo ni Dr. Norman Rabago, ti covid-19 consultant ditoy probinsya nga addan ti mabalin a pagrehistroan dagiti sidadaan a makaawat ti covid-19 vaccine ditoy probinsya.
Daytoy ket partikular iti PGIN Masterlisting of Eligibible Population for covid-19 vaccine nga adda iti online.
Nu pay kasta, inlawlawag na a ti Department of Health met laeng ti mangited ti pinal a listaan dagiti umuna a mabakunaan.
Manamnama a karaman ditoy dagiti frontliners, nurses, doktors, midwives, idndigent senior citizens ken senior citizens nga isuda ti prayoridad a mabakunaan.
Kabayatanna, kuna ni Rabago nga adda amin ti tsyansa iti amin a mabakunaan laketdi agtultuloy a makaawat ti makaumanay a suplay ti bakuna ti probinsya.
Mainaig iti daytoy, inpakaamo ti covid-19 consultant nga adda ti maiyuswat a simulation kadagiti sumarsaruno nga aldaw para iti manamnama a vaccination site ditoy probinsya.
Inlawlawag na nga umuna a maiyuswat ti simulation iti ili ti Solsona, sumaruno iti siudad ti Batac, ditoy siudad ti Laoag ken iti ili ti Pagudpud.
