LAOAG CITY – Addan ti rekomendasyon ti Sangguniang Panlalawigan dagiti tallo a kaso administratibo kontra kadagiti sumagmamano nga opisyal ditoy probinsya.
Segun kenni Sangguniang Panlalawigan Member Da Vinci Crisostomo, chairman ti committee on laws, pinaboran ti junta probinsyal ti kiddaw ni Mayor Alfredo Valdez Jr a maikkan ti due course iti “motion for the notice of appeal” a maipila iti umno nga oras.
Inpetteng iti biang ti nagreklamo a ni Engr. Ernesto Pagaling a saan a mapaboran ti apela ti respondent gapu ta saan a naipasa daytoy iti umno nga oras.
Pinaboran ti junta probinsyal ti partido ti mayor tapno agapela daytoy iti Office of the President mainaig iti sangsanguenna a kaso administratibo.
Kabayatanna, nairekomendar a maibasura ti motion for preventive suspension nga inpila ni Engr. Orlando Perez kontra kenni Pagudpud Sangguniang Bayan Member Reynald Garvida.
Maibilang a moot and academic ti nasao a kaso administratibo gapu ta awanen ti naisumitir a dokumento ken awanen ti maipresentar a testigo malaksid ti agasawa a da konsehal Garvida kenni Barangay Chairwoman Lovella Garvida.
Kabayatanna, agpili ni Vice Governor Cecilia Araneta Marcos mainaig iti kaso administratibo da Sangguniang Bayan Member Perez ken dadduma pay kontra kenni Mayor Joseph De Lara iti ili ti Solsona.
Segun kenni Crisostomo, madesisyonan pay laeng no maipadalan iti preventive suspension ti respondent wenno saan.
Nailanad a no bilang maipadalan iti preventive suspension ti mayor ket madeterminar no maipataw ti 30 nga aldaw wenno 60 nga aldaw ti suspensyon daytoy.
Saan pay a napirmaan ti rekomendasyon ti Sangguniang Panlalawigan, ken nakadepende iti Bise Gobernador no anya ti agbalin a desisyon kadagiti tallo a kaso administratibo.
