LAOAG CITY – Naragsak nga inpakaammo ni Dr. Samantha Licudine, City Veterinarian a babaen iti programada a panangtiliw kadagiti walang aso ket umad-adu dagiti agbalbalin a responsable a pet owners.
Segun kenkuana, maobserbaranna a babaen iti naiget a panangipatungpalda iti nasao a programa ket in-inoten a maad-adaptar dagiti residente ti panangigalot kadagiti tarakenda nga aso tapno maliklikan nga agwarang-warang iti kalsada.
Inlawlawagna a regular ti panangmonitorda kadagiti amin a barangay ditoy siudad ti Laoag ngem nagsardeng laeng gapu kadagiti dimmuprak a bagyo ditoy probinsia.
Innayonna a nangrugi ti nasao a programa idi Hunio no sadinno nga addaan ti sumurok 20 nga aso ken pusa ti adda iti Animal Bite Center.
