LAOAG CITY – Addan ti tallo nga indibidual ti kumpirmado a natay idinto a rinibo a tattao ti naibakwit iti abagatan a paset ti Russia gapu iti napasamak a layos kalpasan a naglepyas ti dam iti Orsk city.
Iti agdama ket adda dagiti agkakadagsen nga earth-moving machinery iti lugar tapno agbunag kadagiti daga a paggabor iti dam.
Immunan a naideklarar ti state of emergency iti intero nga Orenburg region kalpasan a dimmakkel ti lebel ti danom iti Ural River nga ad-adda pay a nagbalin a narisgo gapu iti pannakatunaw dagiti yelo.
Basar kadagiti opisyal iti lugar, umab-abot iti 10 ribo a residente ti adda iti flooding zone idinto nga adda ti agarop 4 a ribo a balay ti mabalin a malapunos ti danom.
Mainaig iti daytoy, inbatad ni Orsk Mayor Vasily Kozupitsa a ti sitwasyon iti lugar ket kumarkaro no sadinno a ti kadakkelan a paset ti ciudad ti apektadon ti layos.
