LAOAG CITY – Inannugot ni Ms. Evalaudia Duyor, Officer In-charge ti Provincial Assessors Office ti gobierno probinsial ti Ilocos Norte wenno PGIN nga adda ti panagliwayda iti “Adigi Homes Project” ditoy siudad ti Laoag.
Nupay kasta, impatalgedna nga ikarkarigatanda a maitrabaho a naimbag dagitoy iti agdama.
Kunana a dagiti plano dagiti maiyestablisar a pasilidad a saan pay a naipatakder ket mannarimaanen a paisagsaganada iti Provincial Engineering Office iti “work and financial plan” dagitoy a pasilidad.
Inbatadna a kalpasan daytoy ket mabalinton dagitoy ti agkiddaw ti pundo para kadagitoy agsipud ta nakaprograma amin dagitoy ket nasken a maileppas amin nangnangruna ket masmasnaayan dagiti nakagatangen ti loteda iti nadakamat a lugar gapu iti saan met laengen a pannakaipatungpal ti plano para iti nasao a lugar.
Segun ken ni Duyor, adu pay ti “available” ken malaksid kadagitoy ket adda pay ti “phase 2” ti nasao a proyekto.
Inlawlawagna a manarimaan payen a maitrabtrabaho dagitoy ken namnamaenna nga aggiddanton ti dati ken ti phase 2.
Kunana a mabalin a baliwandanton ti istratehiada kas iti panangkitada kadagiti manamnama a gumatang sakbay ti pannakaipasdek ti proyekto.
Mangnamnama ti Officer-In-Charge ti Provincial Assessor a makaala dagitoy ti kaduada a tumulong iti “marketing”.
Inpakaammona a ti pagsayaatanna iti phase 2 ket sabali ti disenio dagiti maipatakder a balay.
Innayonna nga umabot iti sanga gasut innem a pulo ket dua dagiti maidiaya a “housing units” iti phase 2 wenno ad-adu pay ken daytoy ket ad-adu no maidasig iti phase 1.
