LAOAG CITY – Nauram iti paset ti Teatro nga adda iti maikatlo a kadsaaran ti Administration Building ti Divine Word College of Laoag.
Segun ken ni Senior Fire Officer 3 Heinrick Damo, Chief Operation ti Bureau of Fire Protection ditoy siudad ti Laoag, alisto a nagramram ti apoy a nangitunda ti napuskol nga asok iti aglawlaw.
Gapu iti daytoy, inbatadna a narigatan dagiti bumbero a sumrek iti nasao a pasilidad.
Nupay kasta, inlawlawagna a natured a sinerrek dagiti bumbero iti nauram a paset ti Teatro tapno insigida a masebseban daytoy.
Kunana nga adda ti uppat a fire truck ti napan nagresponde iti nasao nga uram.
Naammoan nga awan ti nadangran nga estudiante wenno mangisursuro iti pagadalan iti napasamak nga uram.
Innayonna a nagpaut ti sumurok maysa nga oras sakbay a naan-anay a naideklar a fire out ti uram.
Kabayatanna, agtultuloy pay laeng ti maiwaywayat nga imbestigasion iti nasao nga insidente.
