LAOAG CITY – Inkari ni Mr. Jerry Valdez, ti Administrative Officer iti Brgy. 17, Sta. Asuncion iti ili ti San Nicolas nga asikaswen da a dagus ti lubak-lubak a kalsada iti asideg ti barangay hall da.
Segun ken ni Valdez, addan ti immuna a pananggabor da iti nasao a paset ti kalsada ngem ad-adda laeng a kumaro ti sitwasyon iti lugar no agtudo.
Inpasingked ni Valdez nga aniaman a reklamo a dumanon iti barangay da ket solusyonan a dagus ti kapitan da.
Inpakaammo ni Valdez a ti nasao a kalsada ket pagdalanan dagiti heavy equipments isut gapuna a no panagtutudo ket saan a maliklikan ti panaglubak-lubak na.
Innayon na nga addan ti panagkiddaw da ti tulong kadagiti kompanya nga agtagikua kadagiti heavy equipments nga agdaldalayasat iti lugar ngem ti metlaeng naited kadakuada ket ti pinaggabor da a daga no sadinno a kalpasan a nagtudo ket ad-adda a nagwaras dagitoy.
