LAOAG CITY – Inpeksa ni PEMS Eduardo Mabutas Jr., ti Asst. Team Leader ken chief invest iti Highway Patrol Group ditoy probinsya ti karirikna na mainaig iti maysa a grupo partikular iti LTO Alert Ilocos Norte.
Ti nasao a grupo iti social media kangrunaan na iti Facebook ket agipopost ti lokasyon ti pakaisaysayangkatan ti checkpoint ditoy probinsya.
Segun kenni Mabutas, dakkel a kamali daytoy nga addang gapo ta makaapektar iti panangipatungpal da ti linteg trapiko ken iti panangtiliw da ti suspek no adda man ti krimen a mapasamak.
Kinarit na pay ti administrator ti nasao a Facebook Page nga ipresentar na no anya ti patien na a napintas a resulta ti panagpost na ti lokasyon dagiti otoridad a mangiyuswat ti checkpoit.
Inpetteng na pay a babaen iti post ket malapdan ti pannakasita kuma dagiti adda ti violation na iti linteg trapiko.
Mainaig iti daytoy, kuna ni Mabutas a duktuktalen da metten no siasinno ti admin ti page ken mabalin a sumango iti kaso a cyberlibel.
