LAOAG CITY – Kinumpirmaran ni Atty. Julius Balbas, ti Election Officer ditoy ciudad ti Laoag nga ado dagiti sumagmamano a nagkandidato iti Barangay ken Sang. Kabataan Elections idi Oktubre 30 ditoy ciudad a saan a nakaipila ti Statement of Contributions and Expenditures (SOCE) agingga iti deadline idi kalman, Nobyembre 29.
Segun kenni Balbas, awan met ti ammo na a rason no apay a saan a nakapila dagiti dadduma a nagkandidato iti
Statement of Contributions and Expenditures da ken ti listaan dagiti nakaipila ket ipatulod dan iti Manila.
Kunana a basar iti datos da ket kaadoan kadagiti saan a nagpila ti Statement of Contributions and Expenditures da ket dagiti naabak iti eleksyon ken sumagmamano a nagkandidato iti Sang. Kabataan.
Inlawlawag na a ti kangrunaan met a rason dagiti nagkandidato iti Sang. Kabataan a saan a nagpila ket adda ti klase da ken dadduma pay.
Inbinsa-binsa na met dagiti mabalin a sangwen dagiti napaay a nakaipila ti Statement of Contributions and Expenditures da, dagitoy man ket nangabak wenno saan.
Kunana a kadagiti nangabak a saan a nakaipila ti Statement of Contributions and Expenditures ket saan da a makaasumer iti opisina intono bigat, Disyembre 1 ken nayun a pannusa no maduktalan ti Main Office ti Commission on Elections.
Kadagiti met saan a nangabak, agmulta iti 1,000 agingga iti 30,000 a pisos ti saan a nagpila ti Statement of Contributions and Expenditures ken posible pay ti disqualification case.
Mainaig iti daytoy, inbatad na nga addan to met ti panang-evaluate ti komisyon kadagiti Statement of Contributions and Expenditures a naisubmitir ken ditoy a makita no usto met laeng dagiti nailanad kangrunaan na dagiti forms ken suppoting documents kas iti resibo, kontrata, donasyon ken dadduma pay.
No met makitan to ti Comelec nga adda ti discrepancies ket mapaayaban dagiti maseknan.
