LAOAG CITY – Ado dagiti residente ditoy ciudad ti Laoag a mangpabor ti “oplan RODY” nga ipatpatungpal ti Philippine National Police (PNP).
Daytoy ti naamoan ti Bombo Radyo bayat ti pannakisarsarita ti news team kadagiti sumagmamano a residente ditoy ciudad ti Laoag.
Adda dagiti nangibaga a napintas daytoy a kampanya ti PNP tapno mailiklika ti aniaman a desgrasya dagiti umili kas ti insidente iti panagsabrot ti cellphone bayat ti kaadda iti ruwar ti balay.
Maipalagip nga adda ti insidente ti panagsabrot ti cellphone iti paset ti Barangay Nangalisan B ti ciudad ken napasamak daytoy bayat ti panagus-usar ti cellphone ti biktima iti ruwar ti balay da.
Kabayatanna, inpasingked met ti maysa nga agtagikua ti pasdek a 24/7 ti operasyon na a saan nga apektado ti negosyo na gapu ta papanawen na a dagus dagiti saan a gumatang.
