LAOAG CITY – Narway a tattao dagiti nagturong kadagiti nagduduma a grocery store, maysa nga aldaw sakbay ti pannakaipan iti babaen ti Modified Enhanced Community Quarantine (MECQ) ti ciudad ti Laoag.
Segun iti maysa kadagiti napan naggatang iti masapol da iti balay da, napintas ti nasao nga addang tapno malappedan ti panagwaras ti virus ken awanen dagiti maapektaran.
Inbatad na nga itay alas-siete ti bigat ket napanen kadagiti nakalukat pay laeng a pagtagilakoan tapno gatangen na amin dagiti masapol da kabayatan ti MECQ.
Kas kenkuana, ado pay dagiti napan iti sentro ti ciudad tapno adda ti stock da agingga a saan a maikkat ti MECQ ditoy ciudad.
Ummuna iti daytoy, inrakurak ni Gov. Matthew Marcos Monotoc a maipadalan iti MECQ ti ciudad ti Laoag gapo iti agtultuloy a panagado ti kaso ti covid-19.
