LAOAG CITY – Patien ni Dr. Norman Rabago, ti covid-19 consultant ditoy probinsya a nababa ti kumpiyasa wenno dakkel ti panagamak dagiti Pilipino a pakairamanan dagiti kailyan ditoy probinsya.
Daytoy ket partikular iti panagpabakuna ti covid-19 vaccine.
Inbatad ni Rabago a gapu iti daytoy, saan a mapaglikudan a problema ti panangallukoy kadagiti tattao nga agpabakuna ken masapol ti naiget a pannakaipakaamo dagiti importante nga impormasyon wenno ti information mainaig iti covid-19 vaccine.
Kuna na a masapol a mailawlawag a nasayaat a dagiti bakuna a pinutar ti nagduduma a pharmaceutical companies ket dimmalan ken agtultuloy a dumaldalan iti clinical trials rason a saan nga agamak.
Kuna na a saan a mausar ti bakuna wenno maipaay kadagiti tattao nu awan ti pammalubos wenno Emergency Use Authorization (EUA) manipod iti Food and Drug Adminstration (FDA).
Kabayatanna, Inbatad ni Rabago a kadagitoy a gundaway ket manarimana ti pannakabuo ti team a mangtratar ti panagbakuna nu bilang sumangpet ti suplay ditoy probinsya.
Inbunannag na a dumaldalanen iti nagduduma a seminar dagiti kameng ti Municipal Health Office iti kada ili para iti mapaspasungadan a vaccine roll-out ditoy probinsya.
Innayun ti covid-19 consultant a dagiti prayoridad a mabakunaan ket frontliners nga agpapaay iti pribado wenno publiko, indigent senior citizens ken senior citizens.
Nagpanawagan pay ni Rabago a saan nga agamak gapu ta nu awan ti pakaipanan dagiti bakuna, arigna masayang laeng amin ti napagtrabahoan dagiti ekpersto ken nagduduma nga ahensya a kalikagumna a malappedan ti panagwaras ti coronavirus.
Maipalagip a nagorder ti probinsya ti 200,000 doses ti Astrazeneca Vaccine ken manamnama a sumangpet iti kabiitan a panawen.
