LAOAG CITY – Inbatad ni Mr. Eduardo Teodoro B. Ramos, Jr., Columnist iti The Ilocano Educator of Ilocos Sentinel nga ado dagiti nasken a mabaliwan no maipapan iti panagisuro kadagiti ubbing ita a panawen.
Komento daytoy ni Ramos kalpasan a naibilang dagiti estudiante a Pilipino a kababaan iti Creative Thinking Assessment ti Program for International Student Assessment (PISA).
Inpalgak ni Ramos nga adda dagiti mangisursuro a manglaplapped ti creative thinking dagiti estudiante.
Inyarigna a no naidumduma ti panunot ti ubing no kasanu ti panangatake na ti problema ket adda ti gundaway a pagsasawan ti mangisursuro a natangken ti ulo na, ken ipetpetteng na a maymaysa laeng ti solusyon iti problema.
Gapu iti daytoy, bumaba ti confidence ti ubing gapu ta ti panpanunuten na a pangsolbar ti problema ket saan nga isu ti usto a solusyon na.
Inpetteng ni Ramos a no saan a pabus-oyan dagiti estudiante a mangipakita ti creative side da ken awan ti mangbayabay kadakuada ket agtalinaed dagitoy nga arigna robot.
Immunan nga inlawlawag ni Ramos a ti creative thinking ket saan laeng a ti panagpanunot ti naidumduma a solusyon tapno masolbar ti maysa a problema no di ket maipapan daytoy ti panangtingiting ti usto ket maikanatad a solusyon para iti problema.
