LAOAG CITY – Maluksaw dagiti ado nga Overseas Filipino Workers (OFWs) idiay Indonesia kalpasan a nakanselar ti flight da nga agawid koman ditoy Pilipinas.
Iti report ni Bombo International Correspondent Karen Bangug-Heagy, inpakaammo ti Philippine Airlines (PAL) nga adda ti flights da intono Mayo 17 ken Mayo 19.
Gapu iti daytoy, nagdardaras da a nagpa-booking para iti flight da iti Mayo 17.
Nupay kasta, kalpasan ti uppat nga aldaw ket kinanselar ti PAL ti flights da iti saan a masinunuo a rason.
Inbaga ni Heagy a ti kaluksaw da unay ket awan pulos ti palawag ti PAL no apay a kinanselar da ti flights da.
Innayon na a para kadakuada ket dakkel a banag ti inggatang da ti ticket gapu ta nasurok a 10 ribo a pisos ti maysa ken inpetteng na a saanda a pidpiduten ti kwarta.
Inpakaammo na pay a dagiti kakadwa na koma nga agawid ket naikkan ti innem a lawas a bakasyon idinto a dagiti dadduma ket nalpasen ti kontrata da.
