LAOAG CITY – Ado pay laeng dagiti Ilukano a kayat na ti mapan agtrabaho idiay Kuwait.
Daytoy ti inpasingked ni Mrs. Dolores Cortez, OFW Desk Officer iti Kapitolyo Probinsiyal iti Ilocos Norte.
Inlawlawag ni Cortez nga iti baet ti napasamak ti maysa a pinoy worker a ni Joanna Demafelis no sadinno a pinatay dagiti amo na ket saan latta a mabuteng dagiti maseknan nga agturong ti nasao a pagilyan.
Nupay kasta, inbatad ni Cortez a saan pay a mabalin a mapan dagitoy idiay Kuwait gapu ti naipatungpal a deployment ban.
Innayon na nga uray dagiti OFWs nga aggapo idiay Kuwait ken agdama a nakabakasyon ditoy probinsya ket kalikagom da met ti agsubli ti nasao a pagilyan.
Inpakaammo met ni Cortez a dagiti nakabakasyon nga OFWs nga addaan ti re-entry visa ket palubusan da nga agsubli ti nasao a pagilyan.
