LAOAG CITY – Inlawlawag ni Mrs. Edna Orcino, ti Administrator ti Red Cross – Ilocos Norte Chapter nga ado pay ti suplay ti dara ditoy probinsya.
Rakurak na daytoy kalpasan nga adda ti panawagan ti Department of Health (DOH) a mangiyuswat pay ti blood donations gapo iti panagkurkurang ti suplay ti dara iti NCR.
Segun kenni Orcino, idi bulan ti Disyembre iti napalabas a tawen ket ado dagiti naukkon a dara ken makikokordenar da iti dadduma a blood service facilities tapno masigurado a mausar amin dagiti dara ken awan ti maperdi wenno ag-expire.
Inbatad na plano da pay ti mangipaay ti suplay ti dara iti National Capital Region (NCR) tapno masupusupan ti panagkurkurang ti suplay.
Kunana a nakasagana ti Red Cross Ilocos Norte Chapter ket amin met a nagpatpatulong ket naipaayan da.
Nupay kasta, kunana a gapo ta ita a bulan ti Enero ket awan unay dagiti naiyuswat a bloodletting activities, posible nga agsagaba iti sumarsaruno a bulan.
Gapo iti daytoy, inbatad na a mabalin da met ti agimbitar lattan kadagiti nagduduma nga indibidualnga agidonar ti dara.
Kabayatanna, kuna ni Orcino a dakkel ti epekto ti pandemya iti pannakiyuswat ti bloodletting activities a rason metten ti panagkurang ti suplay iti sumagmamano a lugar ti Pilipinas.
