LAOAG CITY – Opisyalen a linukatan ti Mariano Marcos Memorial Hospital and Medical Center (MMMH&MC) ti Adolescent Friendly Health Facility a mabalin a pagturungan dagiti agtutubo nga agpaspasar ti nagduduma a problema.
Segun ken ni Dr. Raymond Jerry V. Baguio, ti Program Manager iti nasao a programa, ti pasilidad ket silulukat mangrugi iti oras ti alas-otso ti bigat agingga iti alas-singko ti malem, lunes agingga iti sabado.
Inlawlawag na a dagiti agtawen ti 10 agingga iti 19 nga agtutubo nga agturong iti nasao a pasilidad ket maipaayan ti naan-anay nga atensyon ken tulong, partikular iti idadalan da iti counselling.
Gagem ti pannakaipatakder ti nasao a pasilidad a maiparikna kadagiti agtutubo nga agpaspasar ti nagduduma a problema a saan da nga agmaymaysa no di ket adda dagiti naayat a tumulong ken mangsaranay kadakuada.
Inpakaammo ni Dr. Baguio a sipud nalukatan t pasilidad ket ado da metten dagiti agtutubo a nagturong iti lugar no sadinno a kaadoan kadagiti napan nagpatulong ket dagiti babbai a nasapa a nagsikog ken dagiti addaan ti problema iti pamilya.
Inpetteng pay ni Dr. Baguio a ti kagrunaan a makitkita da a rason no apay nga ado latta dagiti menor de edad wenno agtutubo nga agsiksikog a nasapa ket gapu iti kinakurang ti pannakaisuro wenno pannakaiyadal ti Comprehensive Sexual Education.
Innayon na a sensitibo man daytoy a topiko ngem kasapulan a maiyadal kadagiti agtutubo aglalo kadagiti babbai tapno matulungan dagitoy a saan nga agbalin nga ubing nga ina ken saan a maperdi ti masakbayan da.
