LAOAG CITY – Pormal a nalukatan iti Adolescent Health and Development Youth Center babaen ti programa ti City Population and Development Office ti gobierno lokal ditoy ciudad ti Laoag.
Segun kenni Ms. Janet Retamal, ti mangidadaulo ti Population on Commission ditoy ciudad ti Laoag, ti pannakaipasdek ti pasilidad ket suportado ti City Health Office, Department of Education ken nagduduma nga ahensia ti gobierno.
Inbatad na a napateg daytoy a pasdek para kadagiti agtutubo, nangnangruna kadagiti agpaspasar ti mental health problem ken nagduduma pay a problema.
Kunana a babaen iti daytoy ket maipaay ti naan-anay a pannarabay ken pammagbaga kadagiti agtutubo tapno malapdan ti depresyon, pakairamanan ti sexual harassement, problema ti pamilya ken pannakabully.
Innayon na a babaen iti iyaasideg iti nasao a pasilidad ket mabalin a maliklikan ti dakdakkel pay a problema a sangwen dagiti agtutubo.
