LAOAG CITY – Adu ti nangbabalaw ti nagbalin a rakurak ni United States president-elect Donald Trump.
Daytoy ket kalpasan ti inrakurakna nga apaman a makatugaw isuna iti puesto ket mangipataw daytoy ti 25% a taripa kadagiti amin a produkto a sumrek iti Estados Unidos nangruna iti Canada ken iti Mexico.
Gagem daytoy ket tapno masolbar dagiti iligal migrants a sumsumrek idiay Estados Unidos.
Inbatadna nga adda ti 10% a maipataw a taripa kadagiti produkto met nga aggapu iti China tapno mabantayan ti panagserrek ti droga nangruna kadagiti fentanyl.
Mainaig iti daytoy, segun ken ni Mexican President Claudia Sheinbaum a ti panangipataw ti nangato a taripa ket saan a makasolbar ti problema iti iligil migrants ken inpasingkedna a sumubbotda iti panangipataw met kadagiti taripa.
Tinawagan met ni Canadian Prime Minister Justin Trudeau ni Trump kalpasan ti rakurakna ken nakasagana a maaddaan ti “constructive way” a makatrabaho ni Trump.
Kabayatanna, ti Chinese embassy iti Washington ket mamati a mutually beneficial ti economic ken trade cooperation-da idiay Estados Unidos gapu ta awan ti mangabak iti trade war wenno tariff war.
