LAOAG CITY – Inadmitir ni Barangay Chairman Elmar Siazon, iti Brgy. 28 ditoy siudad ti Laoag nga adda dagiti sumagmamano a kabarangayan da a bengngeg no sadino nga ipilit da iti rumwar iti pagtaengan da.
Inlawlawag na nga adda dagiti rumwar tapno mapan aglang-ay idinto nga adda met dagiti rumwar tapno agtrabaho tapno adda ti agserbi iti pamilya da.
Kuna ni Siazon a sumurot da kuma iti protocol kalpasan a naipatungpal ti lockdown iti maysa a paset ti Sitio iti barangay no sadino a lugar ni IN-C 561, lalaki, agtawen ti 25.
Segun kenni Siazon, 26 a pamilya dagiti naapektaran iti 30 meter radius manipud iti lugar ti nagpositibo iti COVID-19.
Inbatad na nga adda ti tallo a tattao a maibilang a contact ti maseknan a nagpositibo sipud itay bigat.
Kiniddaw ti kapitan iti tulong dagiti kabarangayan da nga ibutaktak no siasinno dagiti nakapulpulapol dagitoy tapno alisto a masolbar ti problema.
Kabayatanna, nagyaman ni Siazon iti kabarangayan na a nangted ti ayuda kadagiti naapektaran ti lockdown.
