LAOAG CITY – Inadmitir ni Barangay Kagawad Manny Morales iti Brgy. 1 ditoy siudad ti Laoag a saan a masapasap a bantayan iti barangay.
Kuna na a 12 a kameng ti barangay ti agduty idinto a magudua pay daytoy nga adda ti agduty iti bigat ken iti rabii.
Segun kenni Morales, kadua da dagiti kameng ti Philippine National Police nga bantay iti barangay kabayatan ti lockdown.
Inbunannag ni Morales nga adda dagiti maaw-awat da a reklamo mainaig iti kinasubeg dagiti kabarangayan da no sadinno nga aglibas dagitoy iti baet a naipatungpal ti ECQ iti barangay uno.
Kuna na a naminadun a daras iti panangpalagip da kadagiti maseknan ngem arig nga ikarkaro met dagiti bumarangay ti panagbalin da a nasubeg.
Inulitan ni Morales iti panangpalagip manen dagiti kabarangayan na a sumurot kadagiti linaon iti executive order a naipatungpal iti nasao a barangay.
Immunan nga adda ti dimmanon a report iti Bombo Radyo Laoag mainaig iti panaglibas dagiti sumagmamano a residente ken maipagarup saan a nasita dagiti nakabantay.
