LAOAG CITY – Adun ti simmayaatan ti salun-at dagiti maladaga a kaipasngay agingga iti 59 a bulan iti napalabas a tawen 2025 no maidasig kadagiti kallabes a tawen.
Segun ken ni Provincial Nutrition Action Officer Mrs. Elma Irapta, daytoy ket gapu iti naiget a suporta dagiti nagbalin a gobernador ti Ilocos Norte kangrunaanna kada Gov. Cecilia Araneta Marcos ken iti administrasion ni Vice Gov. Matthew Marcos Manotoc bayat a daytoy ti gobernador ti probinsia.
Inlawlawagna a no ti pagsasaritaan ket ti “underweight” manipud 2.85 idi tawen 2024 ket nagbalin a 2. 4 itay napalabas a tawen 2025; bimmaba met ti prevalence rate ti stunting manipud 5.69 ket nagbalinen a 5.1.
Kunana a ti nakamaymayat ket ti “wasting” agsipud ta manipud iti 1.30 idi tawen 2024, nagbalin laengen a “point nine” itay napalabas a tawen 2025 ken ti overweight ket bimmassit met manipud iti 3.25 ket nagbalinen a 3.0.
Mangnamnama ni Irapta nga agtultuloy ti panagbabana tapno masolbar ti problema ti malnutrision ditoy probinsia.
Inbatadna a gapu iti “feeding program” a nairugi idi panawen ti pandemia ken naitultuloy agingga iti agdama a tawen ket ado ti nagbaliwanna.
Innayonna nga adda ti tallo a “feeding program” para kadagiti ubbing nga agtawen ti tallo agingga ti lima a “wasted” sabali ti para kadagiti maladaga nga innem pay laeng a bulan agingga iti agtawen ti innem gapu ta agsasabali da ti makan ken “feeding” para kadagiti “pregnant” ken “lactating women” wenno dagiti masikog ken dagiti agpaspasuso.
Inbatadna a naisentro ti programa ti gobierno probinsial kadagiti ubbing, masikog ken agpaspasuso nga inna gapu ta dagitoy ti sensitibo iti malnutrision wenno dagitoy ti kangrunaan a maap-apektaran.
Nupay kasta, kunana a planoda a maaddaan ti programa para kadagiti “senior citizen,” “teenage moms” ken dagiti “persons with disability” wenno dagiti adda rangkap ti bagina.
