LAOAG CITY – Inlawlawag dagiti advisers iti Barbarar Elementary School iti ili ti San Nicolas ti isyu maipanggep ti panangituloy da ti popularity contest kas selebrasyon ti Valentine’s Day iti baet a maipagarop a saan nga immanamong dagiti nagannak.
Segun kadakuada, iti kada classroom ket adda ti taripnong a naiyuswat a nagatendaran dagiti nagannak nga isu ti nangilawlawagan dagiti advisers ti maipanggep iti popularity contest, ken awan met dagiti kimmontra kadakuada.
Inpetteng da a saan da a piliten dagiti nagannak ken estudyante nu saan da kayat, ken saan nga inkapilitan ti raffle ticket a masapol nga ilako da agsipud ta adda ti nagsolisitan da kadagiti papremyo da.
Inadmitir da a napagsasaritaan da a dagiti 10 ribo a pisos ti kwarta na agpangato ket sumrek ti royal court ngem inlawlawag da a saan nga inkapilitan daytoy.
Naamoan a ti naukkon a kwarta ti nasao a pagadalan ket mainayon ti paggatang da ti transformer.
