LAOAG CITY – Ginutigot ni Atty. Joel Ginez, Comelec Supervisor ditoy probinsya ti publiko nga ireklamo iti opisina na ti maipagarop a panaggatang ti butos dagiti kandidato iti 2019 midterm elections.
Segun kenni Ginez, ipresentar laeng dagiti mapan agreklamo ti kwarta nga inted ti kandidato ken ti affidavit ti immawat a botante a mangibagbaga ti maipagarop a panaggatang ti butos.
Inbatad na nga uray awan ti ladawan iti nasao nga aktibidad gapo ta ti napateg ket ti kwarta ken affidavit.
Inlawlawag na a gagangay a paglikudan ti kandidato ti maipagarop a panaggatang na ti butos ngem ti mangipaneknek ket ti affidavit nangruna no ado dagiti maseknan.
Inpetteng ni Ginez a ti kangrunaan a kalaban iti panawen ti eleksyon ket ti “vote buying” a nabayagen a rumbeng kuma a maisardeng.
