LAOAG CITY – Inpetteng ti Armed Forces of the Philippines a saanda nga agpaapektar ti aniaman a mapagsasaritaan a pangpulitika ken denggenda ti opinyon dagiti Pilipino.
Daytoy ti inpetteng ti Armed Forces of the Philippines kalpasan a rimmuar ti resulta ti OCTA Research no sadinno a 7 iti 10 a Pilipino ti saan a kumanunong a makibiang ti militar iti pulitika.
Inbatad ni Armed Forces of the Philippines Spokesperson Col. Francel Margareth Padilla, imbes a makibiang kadagiti pangpulitika, ad-adda nga agpokusda kadagiti responsibilidad a protektaran dagiti Pilipino basar iti Konstitusion.
Inpettengna a saan a trabaho ti Armed Forces of the Philippines ti makibiang iti pulitika.
Inlawlawagna a ti rumbeng nga aramidenda ket bantayan ti pagilian, pagtalinaeden ti kinakappia ken ipatungpal ti linteg.
