LAOAG CITY – Naglikudan ken kinondenar ti liderato ti Armed Forces of the Philippines (AFP) dagiti malisyoso nga alegasion nga agwarwaras iti online mainaig iti maipagarop a ₱15 billion military ghost projects manipud 2023 agingga 2025.
Segun kenni AFP Public Affairs Office (PAO) Chief Col. Xerxes Trinidad, awan ti kinapudno na dagiti alegasion, iresponsable, ken nalawag a panggep na a dadaelen iti institusyon ken ti liderato daytoy.
Inlawlawag ni Trinidad a saan nga ipatpatungpal wenno ponpondoan nga aniaman nga imprastruktura.
Inbatad na pay nga amin a pasilidad ti militar iti babaen ti programa nga Infrastructure for Peace and Security (TIKAS) ket pinondoan ken ipatungpal ti Department of Public Works and Highways (DPWH).
Nupay irekomendar ti AFP dagiti proyekto a naibasar iti operational needs kas iti barracks, training facilities, ken headquarters buildings, direkta a maited ti pondo iti DPWH.
Kunana pay a i laeng nakompleto a proyekto ti awaten ti AFP ken saan a mairaman iti proseso ti panaggatang, engineering wenno panag-audit.
Innayon ti AFP a ti “completion” a nadakamat kadagiti misleading reports ket dagiti laeng nalpas a paset ti konstruksiyon para iti partikular a tawen, ken saan na a kayat a sawen a nalpasen ti sibubukel a proyekto.
Ti panangawag iti nalpas a paset a “ghost project” ket nalawag a saan nga umiso a panangipatarus iti proseso ti gobierno iti panangi-budget iti imprastruktura.
