LAOAG CITY – Dead on the spot dagiti ag-live-in partner kalpasan a pinaltu-paltogan dagiti saan pay a nabigbig a suspek a nakalugan ti motorsiklo iti Barangay 21 iti ili ti San Nicolas.
Nabigbig dagiti biktima nga isuda Joshua Madamba, agtawen ti 27, Barangay Kagawad iti nasao a barangay ken ni Eloisa Jane Pagadoan Bonilla, agtawen ti 30 ken maysa nga Online Accounting Staff.
Segun ken ni Mrs. Julieta Pagadoan, ina ni Eloisa Jane, kabayatan ti panagsasaritada iti sango ti pagtaenganda ket adda ti limmabas a nakamotorsiklo.
Inbatadna a saan a nagbayag ket nagsubli ken nagsardeng dagitoy iti mismo sangoanan ti pagtaenganda.
Inlawlawagna a ti immuna ket inpagarupda nga agi-deliver laeng dagiti nakamotorsiklo ti parcel kadakuada.
Nupay kasta, kunana nga apaman a linukatan dagiti suspek ti motorsiklo ket ditoy nga inruarda ti paltog ken insigida a pinaltu-paltoganda dagiti biktima iti sumagmamano a daras.
Mainaig iti daytoy, immuna a napaltogan ni Eloisa ken simmaruno ni Joshua a ginandatna pay ti agtaray nga umadayo ngem pinaltu-paltogan latta isuna dagiti suspek.
Innayon ti ina ti maysa kadagiti biktima a saanna a masinunuo no asino ti mabalin nga adda iti likudan ti pammaltog gapu ta awan met ti naibagbaga kenkuana ti anakna a problema, nakariri wenno nakaawat ti pangta ti biag.
Naammoan nga idi bulan ti Pebrero ket adda ti nanguram iti lugan ni Eloisa iti saan pay a masinunuo a rason.
Kabayatanna, rumrummuar a calibre 45 a paltog ti nausar iti nasao nga insidente.
Iti agdama, agtultuloy ti naun-uneg nga imbestigasion dagiti otoridad mainaig iti pammaltog.
