LAOAG CITY – Gutgutiguten ni Ms. Janet Retamal, mangidadaulo ti Commission on Population Office ditoy siudad ti Laoag dagiti ag-live in partner a mapan agaplikar iti opisinada para iti maiyuswat a Mass Wedding.
Segun kenkuana, ti panagaplikar iti Mass Wedding ket agngudo inton Setiembre 15, sangapulo nga aldaw sakbay ti target date-da a Setiembre 25.
Inlawlawagna nga awan ti gastosen dagiti maseknan nga ag-live in partner nga agkalikagum nga agkallaysa gapu ta awan ti bayadanda iti marriage fee, certification fee ken dadduma pay.
Kunana a naragsakda a matulungan dagiti ag-live in partner nga agkallaysa nangruna kadagiti nabayagen nga agdendenna ngem saanda pay a nagkasar.
Innayonna a naragragsak ti panagasawa ti dua nga indibidual no dagitoy ket naan-anay met laeng nga agkallaysa tapno maipasigurado nga isuda laeng ti ay-ayaten ken kapisi iti puso ti asawada.
