LAOAG CITY – Inpakaammo ni Mr. Edgar Magaoay, agtawen iti 51, naasawaan ken residente iti Brgy. Cabusligan iti ili ti Bacarra ken maysa kadagiti biktima iti napasamak a pammaltog nga addan dagiti naaw-awatda a pangta iti biag sakbay ti insidente.
Segun kenkuana, namin-walo a daras a nagpaputok ti paltog dagiti suspek kadakuada kas maibasar iti nakitana a kapsula ti bala ti paltog iti uneg ti pagtaenganda.
Inlawlawagna nga apaman a nakastrekdan iti pagtaenganda kaduana ti anakna a ni Jerremias Magaoay nga agtawen iti 24 a nakaluganda iti motorsiklo ket saanda nga inpagarup a ti simmaruno kadakuada a motorsiklo ket isu metten ti nagpaputok kadakuada ti paltog.
Inbatadna a kalpasan ti panagpaputok ti paltog dagiti suspek ket dagus a naglibas dagitoy usar ti naglugananda a motorsiklo nga agpa-laud.
Kunana a saanna a malasin dagiti suspek ngem malagipna ti motorsiklo a nausar iti krimen nga Euro 152.
Mainaig iti daytoy, inpalgakna a mamati daytoy nga adda ti pakainaiganna ti kaso a sangsangoen ti barona gapu iti panagdanog iti kallabes iti napasamak kadakuada.
Itudtudona ti agnagan ti Viviano Magaoay nga adda iti likudan iti napasamak a pammaltog.
Kabayatanna, naiget a naglikudan ni Viviano nga isuna ti utek iti napasamak a pammaltog kadagiti agama a Magaoay.
Kunana nga awan ti ammona iti maipabpabasol kenkuana gapu ta awan met ti ar-aramidenna a dakes.
Innayonna a no bilang mapaneknekan nga awan ti basolda ket isaklangna met dagiti agama.
