LAOAG CITY – Adda ita iti kustudiyar ti PNP-Bacnotan, idiay La Union dagiti agama a taga Ilocos Norte kalpasan a nakita da a magmagna dagitoy.
Segun kenni Police Major Reginaldo Dalipias, chief of police iti ili ti Bacnotan, idi agsipnget idi rabii ket nakita dagiti pulis nga agidurduron ti kariton isut gapo na nga innala da iti istasyon da.
Binigbig na dagiti agama nga isuna Mr. Juny Fortez ken ti anak na a ni Josephine nga agtawen ti 14.
Inlawlawag ni Dalipias a basar iti palawag ti ama ket naggapo da pay laeng idiay Las Piñas ken rinugyan da ti nagawid idi Pebrero 14 ken mapan da iti Barangay Poblacion dos iti ili ti Pagudpud.
Naamoan a ti kariton ket isu ti dinurduron ti ama idinto a ti bisikleta nga adda ti sidecar na ket isu ti iggem ti anak na.
Inbatad na nga idi dinamag na no taga sadinno dagitoy ket inbaga ti ama nga iti ili ti Pagudpud ngem idi inawagan na ti hepe ti nasao nga ili ket naduktalan na a saan a residente iti lugar dagiti maseknan.
Gapo iti daytoy, inadmitir ti ama a taga Mindanao da ken ti kabsat na nga agnagan ti Josephine a naikamang iti ili ti Pagudpud ti pagtarusan da ditoy Ilocos Norte.
Mainaig iti daytoy, kuna ti hepe nga awan ti dokumento dagiti agama.
Agpapan maisursurat ti damag ket saan da pay a nakontak ti kapamilya da ditoy Ilocos Norte.
Inbaga na a sipud idi rabii ket innala da dagiti agama tapno maikkan ti makan ken ado dagiti napan nangted ti tulong partikular ti taraon.
Innayon ni Dalipias a saan da a palubusan dagiti agama agingga nga awan ti sigurado a mangala kadagitoy tapno mailiklikan da ti anyaman a dakes a pasamak.
