LAOAG CITY – Kinumpirmaran ni Police Capt. Dionisio Baldillo, ti chief of police iti ili ti Bacarra nga adda ti napasamak a panagtagtagbat iti Barangay Sangil iti nasao nga ili itay parbangon a nakainaigan ti agama.
Inbaga ni Baldillo nga iti imbestigasyon da, kabayatan ti panaginom dagiti agama ket adda ti saan da a nagkinnaawatan.
Rumrumuar nga iti papan ti ama, agtawen ti 88 iti pagturturugan na ket sinaruno ti anak na nga agtawen ti 48 tapno mapan na kitaen daytoy.
Nupay kasta, ditoy metten a maipagarop a tinagbat ti ama ti anak na ket sinubbot met ti ub-ubing.
Gapu iti daytoy, nasugatan ti akin-knanawan a takyag ken ti dua a saka ti anak idinto a ti ama ket nagsagaba met ti sugat iti ima, saka, ken akinngato a paset ti bagi na.
Agpada dagiti agama a naitaray ken naka-confine iti agdama iti Mariano Marcos Memorial Hospital and Medical Center iti ciudad ti Batac.
Naamoan a dagiti agama ket saan da a taga Bacarra ngem adda laeng ti banbantayan da a maar-aramid nga establisimiento iti nadakamat a barangay.
