LAOAG CITY – Nakabaluden iti Ilocos Norte Provincial Jail (INPJ) ditoy ciudad ti Laoag dagiti agama a nakilaban ken nakiinnagaw ti paltog kadagiti pulis idiay Piddig, Ilocos Norte.
Binigbig ni Police Senior Inspector Jephre Taccad, ti chief of police iti ili ti Piddig dagiti agama a suspek a da John Chris Bartolome ken ni
Noel Bartolome, agpada a residente iti Barangay 1, Cabaroan ti nasao nga ili.
Immuna ti daytoy, naireport iti PNP ti panagrirriri dagiti agama a suspek bayat a nakainom da ti nasanger isut gapuna a napan nagresponde da SPO1 Jefreson Taberner, PO3 Aries Acosta ken ni PO2 Dexter Castro.
Nupay kasta, imbes nga agsardeng dagiti agama ket ginandat da a bakalen dagiti pulis ken agawen ti paltog ti maysa a pulis.
Malaksid ti daytoy, kuna ni Taccad a pinagsasawan pay dagiti agama ti saan a maiparbeng a sarita dagiti kakadwa da a napan nagresponde.
Gapu ti daytoy, pinilaan da dagiti agama ti kaso a direct assault upon an agent of a person in authority.
Nairekomendar ti sag-12 a ribo a pisos a piyansa dagiti agama para ti temporaryo a pannakawaya-waya da.
