LAOAG CITY – Naglikudan dagiti agama nga Abondo iti ili ti Paoay ti alegasyon a dinangran da dagiti dua a trabahador da nga agpapaay iti gasolinaan da kalpasan a naduktalan a nagtakaw dagiti maseknan manipod iti naglakwan da.
Naamoan a ti nasao a gasolinaan ket imanmanihir ti ubing nga Abondo.
Inadmitir dagiti agama nga Abondo a nakapungtot da idi naduktalan da a nagtakaw dagiti dua nga empleado iti naglakoan da ngem saan da a dinangran dagitoy gapu ta nakontrol da paylaeng ti bagida.
Nadismaya da iti inaramid dagiti dua nga empleado gapu ta trabahador da ti maysa sipud idi 2016 idinto a ti maysa ket idi 2018.
Mainaig iti daytoy, inadmitir dagiti dua nga empleado a nagtakaw da iti naglakoan da ken dakkel ti panagbabawi da iti inaramid da.
Kabayatanna, inlawlawag dagiti dua nga empleado a saan a pudno ti maibagbaga a saan da a nakaawat ti bonus gapu ta malaksid iti cash a naawat da ket naikkan da pay ti in kind manipod iti amo da.
Gapu iti napasamak ket inikkat dagiti agama nga Abondo dagiti dua nga empleado ken patien da a ti alegasyon kadakuada a nangdangran kadagitoy ket adda ti maris pulitika na.
Daytoy ket gapu ta rumrumuar nga adda ti umas-asideg kadagiti dua nga empleado ken ididiaya da a tulungan da dagitoy a mangbayad iti tinakaw da a kwarta manipod iti paggasolinaan ti pamilya Abondo.
Ti ama nga Abondo ket agpaidasig a para mayor iti ili ti Paoay.
