LAOAG CITY – Inlawlawag ni Ms. Cherry Joy Garma, ti Information Officer ti DepEd Division of Ilocos Norte nga adda ti agarop 100 a teaching ken non-teaching positions ti bakante.
Segun kenni Garma, daytoy ket gapo ta saan a mapaggigiddan ti iskedyul dagiti personnel tapno maka-interview ken agatendar kadagiti demo kasta pay ti hiring ken promotion processes.
Inbatad na nga iti laksid nga adda dagiti bakante iti posisyon iti DepEd-Ilocos Norte ket saan met a kurang dagitoy wenno saan a maipektaran ti pannakaisuro dagiti estudyante.
Kunana nga iti maysa a mangisursuro ket 40 nga estudyante ti isuro na basar iti ratio, ken ita agdama, ti division of Ilocos Norte ket addaan ti 4189 teaching personnel ken 89k enrollees ken daytoy ket maibilang pay laeng manageable wenno kontrolado.
Mainaig iti daytoy, inbatad na nga agtultuloy met ti hiring processes ken ti ranking para iti promotions.
