LAOAG CITY – Kinumpirmaran ni Vice Mayor Pedro Rex Aguinaldo iti Pasuquin, Ilocos Norte nga adda dagiti agarop 100 a residente iti Sitio Bungro, Barangay Pragata ti nasao nga ili a naibakwit.
Daytoy ket kalpasan a nalayos ti nasao a barangay iti panagdakkel ti danom iti baybay.
Inbatad na nga iti agdama ket nagtalinaed dagiti nasao a residente iti evacuation center ken adda metten dagiti maipaay kadakuada a tulong.
Inlawlawag na nga apaman na naidanun iti pannakalayos ti nasao a barangay ket insigidad a nagturong dagiti kameng iti Municipal Disaster Risk Reduction and Management Council, PNP, BFP ken dadduma pay a maseknan nga ahensya.
Inadmitir ti bise mayor nga adda latta dagiti nagtalinaed iti balay da a residente ti nasao a barangay ngem possible a no kumaro ti sitwasyon ket masapol a piliten da dagiti masekna nga agbakwit.
Inpasingked na a naka-standby dagiti maseknan nga otoridad iti lugar tapno insigida a matulungan da dagiti residente no kasapulan.
Kabayatanna, inbatad ni Aguinaldo a malaksid iti Barangay Pragata ket umabot met iti 20 a balay ti apektado ti layos iti Barangay Caroan iti ili a Pasuquin.
Mainaig ti daytoy, inbalakad ti bise mayor kadagiti kailian na a masapol nga agridam da iti daytoy panagtutudo.
