LAOAG CITY – Naka-standby dagiti naruay a soldado ti Estados Unidos para iti possible a pannakaideploy da idiay Minneapolis.
Basar iti US defence official, umabot iti 1,500 a soldado nga agdama a nakabase idiay Alaska ti naka-standby no makadesisyon ni US President Donald Trump nga agusar ti active duty military personnel, kabayatan ti agtultuloy a tignay protesta kontra iti Immigration and Customs Enforcement (ICE).
Naamoan a dagiti soldado a manamnama a maideploy ket kameng da iti 11th Airborne Division iti Fort Wainwright.
Mainaig iti daytoy, ginutigot dagiti opisyal idiay Minnesota dagiti protesters nga agtalinaed a kalmado kabayatan ti tignay protesta.
Namonganay ti nabara ken nalawa a tignay protesta idiay Minnesota kalpasan a pinaltugan ti maysa nga Immigration and Customs Enforcement agent ti US citizen a babai a ni Renee Good a poon metten ti nakatayan na iti nasapa a paset ti bolan.
