LAOAG CITY – Simmangpeten ditoy pagilyan ti umuna a shipment ti Moderna COVID-19 vaccines idi rabii.
Umabot iti agarop 249,600 doses ti simmangpet iti Ninoy Aquino International Airport Terminal 3, sakbay a nag-alas onse idi rabii.
Manipod iti 249,600 doses ket 194,400 ti ginatang ti gobyerno idinto a 55,200 ti ginatang ti private sector.
Naamoan a ti Pilipinas ket gimmatang iti agarop 20 million doses ti bakuna manipod iti Moderna a maysa nga American brand, no sadinno a 13 million ditoy ket binayadan ti national government idinto a pito a milyon met ti private sector.
Basar iti evaluation ti Philippine Food and Drug Administration, ti Moderna ket addaan ti efficacy rate a 94 a porsiento ken mabalin nga ibakuna para iti agtawen ti 18 agpangato.
