LAOAG CITY – Nasurok a kagudua dagiti pampubliko a pagadalan iti pagilian ti agop-operar nga awan ti principal na iti baet ti pagannurutan a mangipapaay ti mandato iti principal plantilla items iti kada pagadalan.
Iti report ti Second Congressional Commission on Education (Edcom 2) Year 2, nakita nga agarop 25,000 a pagadalan iti babaen ti Department of Education (DepEd) nga awanan ti fully designated principals.
Segun iti Second Congressional Commission on Education, adda ti pakabuklan a 24,916 a pagadalan ti awan principal na ken 13,332 kadagitoy ket idadaulwan laeng dagiti head teacher; 8,916 a pagadalan ti idadaulwan laeng ti teacher in charge (TIC); 2,337 ti officer in charge (OIC); ken 193 ti “undefined.”
Kayatna a sawen daytoy ket 20,381 laeng manipod iti 45,199 a pagadalan ti addaan ti principal, nupay saan nga amin dagitoy ket addaan ti corresponding plantilla item.
