LAOAG CITY – Umabot iti agarop dua ribo nga indibidual ti karaman kadagiti maanomalya a flood control projects ti gobierno.
Daytoy ti inbutaktak ni Senate President Pro Tempore Panfilo Lacson.
Inaramid daytoy ni Lacson kalpasan nga inrakurak ni Independent Commission for Infrastructure Commissioner Rogelio Singson nga adda ti nasurok a 1,200 a personalidad nga im-imbestigaren da mainaig iti kaso.
Kuna na a manipod iti pakabuklan a 472 a ghost flood control projects nga ininspeksyon ti Independent Commission for Infrastructure, ket sigurado daytoy nga umabot iti agarop 2 ribo nga indibidual dagiti karaman.
Maipalagip a ni Lacson ti nangibutaktak kadagiti ghost ken substandard flood control projects iti Oriental Mindoro ken Bulacan.
Immunan a dinayaw ni Lacson ti nagbalin nga addang ti Independent Commission for Infrastructure, aglalo ti panangirekomendar da ti plunder, graft ken bribery a maipila kotra iti kasinsin ni President Ferdinand Marcos Jr. a ni dati nga speaker Martin Romualdez ken ni resigned Ako Bicol party-list congressman Zaldy Co, no sadinno a dagiti kompanya da nga Hi-Tone Construction and Development ken ti Sunwest,ket naduktalan a karaman kadagiti ghost projects.
Mangnamnama ni Lacson a saan nga isrdeng ti gobierno ti mangipursige kadagiti kaso kontra kadagiti suspek, pakairaman ditoy ni Co a naibilin ti pannakaarestar na babaen ti Sandiganbayan para iti kaso na a malversation ken graft mainaig iti ghost project babaen ti Sunwest iti Naujan, Oriental Mindoro.
