LAOAG CITY – Inbatad ti Commission on Elections (Comelec) nga umaboten iti agarop 30 a milyon a balota ti naimprenta para iti May 2025 national and local elections.
Segun ken ni Commission on Elections Chairman George Garcia, ti poll body ket kasapulan a makaimprenta ti 72 a milyon a balota iti National Printing Office (NPO).
Nupay kasta, kuna ni Garcia a ti bilang ti verified ballots iti agdama ket addan iti 5.6 milyon agingga iti 6 milyon laeng.
Inlawlawag ni Garcia a ti kada maimprenta a balota ket saan a perpekto a kas it kwarta nga adda dagiti agpalpak kas ti saan nga usto a pannakaputed, saan nga usto ti marisna wenno adda ti smudge na.
Gapu iti daytoy, kuna ni Garcia nga iti kada balota ket dumaldalan iti two-level verification process, a ti maysa ket maar-aramid manually ken ti dadduma ket maar-aramid babaen iti makina.
Innayon ni Garcia a nasurok a 1,000 nga indibidual ti adda iti National Printing Office ken mano-mano nga iberberipikar da dagiti balota.
Kunana pay a no saan a makapasa kadakuada ket saanen a maipadalan iti machine level wenno ma-reject a dagusen dagiti balota.
Nupay kasta, inpasigurado ni Garcia a dagiti balota ket nakasagana aminen intono Abril 14 gapu ta malpas ti panagimprenta intono Marso 19 ita a tawen.
