LAOAG CITY – Dinayyeg ti magnitude 7.6 a gingined iti central Japan ken nangiparuk-at ti tsunami warning dagiti otoridad para kadagiti agnanaed iti west coast.
Basar iti report, umabot iti 36,000 a balay ti napukawan ti kuryente iti Ishikawa ken Toyama prefectures, a supsuplayan ti Hokuriku Electric Power.
Nagsardeng pay ti operasyon iti sumagmamano nga erupuerto ken tren iti rehiyon a naapektaran ti napigsa a panagdayyeg.
Immunan a nairekord ti maysa a metro a kangato ti dalluyon iti baybay kalpasan ti napigsa a gingined isut gapuna a nangiparuk-at ti Japan Meteorological Agency ti tsunami alert kadagiti agnanaed iti coastal prefectures ti Ishikawa, Niigata ken Toyama.
Nangipruk-at pay ti Russia ti tsunami warnings iti maskaupan da a Vladivostok ken Nakhodka.
Agtultuloy nga am-amwen dagiti otoridad ti kalawa ken kaado dagiti nadadael iti napigsa a panagdayyeg kagiddan ti panagballaag da kadagiti residente a namnamaen dagiti aftershocks.
Mainaig iti daytoy, inbalakad ni Prime Minister Fumio Kishida a masapol nga agtalinaed nga alerto dagiti residente kalpasan ti insidente.
