LAOAG CITY – Umabot ti agarop 3 ribo kilo nga imported frozen meats ti nakumpiskar dagiti otoridad iti paset ti Barangay 6, San Juan Bautista iti ili ti San Nicolas.
Immuna iti daytoy, nagturong iti kwerpo ti pulisya ni Leonard delos Santos, meat inspector iti nasao nga ili kalpasan nga adda ti nangidanun kenkuana nga adda ti kinarkarton nga imported frozen meats a nailugan iti maysa a van ken naideliver iti balay ti agnagan ti Rex Basilio iti nadakamat a barangay.
Ti van ket nainagan iti Sherwin Allan DC Lapuz, taga B27 L19E Sorrento Camelia Panipuan Mexico Pampanga.
Sakbay iti dayta, binilin ni delos Santos dagiti dua a kakadwa ni delos Santos nga isuda Medel Daoang ken Jesus Felipe nga umuna dan a mapan iti lugar ket ditoy a nadanun da nga agidisdissaag dagiti helpers ni Basilio kadagiti kinarton a frozen meats.
Nupay kasta, apaman a nakita ti driver ti van ken ti pahinante na dagiti dua a meat inspectors ket nagtalapwagaw a dagus.
Insigida met a napan nagresponde dagiti kameng ti PNP ken Highway Patrol Group (HPG) iti lugar kalpasan a naipakaammo kadakuada ni delos Santos ti nasao a pasamak.
Awan ti naipakita ni Basilio a certificate of meat inspection, shipping papers wenno aniaman a dokumento a mangipaneknek a legal ti pannakaibiyahe dagiti umabot 147 boxes wenno 2,665. 07 kilograms nga imported frozen meats nga agbalor ti 319, 808 ribo a pisos.
Rumrumuar a dagiti karne ket aggapo da idiay Germany ken France, basar iti markings dagiti karton a nakaikargaan da, ken dagitoy ket mabalin a maluto iti nagduduma a putahe kangrunaan na ti bagnet.
Kiniddaw met dagiti meat inspectors kada Provincial veterinarian Doctor Loida Valenzuela ken Municipal Agriculturist Norma Calamayan ti panangisayangkat da ti naan-anay nga imbestigasyon mainaig iti nasao a pasamak.
Nangala met ni Doctor Valenzuela ti sample dagiti karne para iti pannaka-eksamen dagitoy.
Kabayatanna, iti eksklusibo nga interview ti Bombo Radyo Laoag ken ni Valenzuela, inpakaammo na nga inreport na a dagus ti pasamak kadagiti maseknan nga ahensya ti gobierno kas iti Bureau of Animal Industry (BAI), National Meat Inspection Service, pakairamanan da Governor Matthew Marcos-Manotoc ken Vice Governor Ma. Cecille Araneta-Marcos.
Innayon na a saan met a nagresistir ni Basilio idi napanda kinumpiskar dagiti imported a karne ken dagus da a napan inkali dagitoy.
Iti agdama, manarimaan met ti imbestigasyon ti PNP ken HPG iti van a nakailuganan dagiti nakumpiskar a karne kalpasan nga intarayan ti driver ken pahinante na.
