LAOAG CITY – Nagpasar ti nadamsak a pannakadisiplina iti pagtaengan da ti agarop 400 a milyon nga ubbing iti intero a lubong.
Daytoy ket basar iti panagadal nga inyuswat ti United Nations Children’s Fund (UNICEF).
Iti datos, dagiti nadakamat nga ubbing ket agtawen ti 5 agpababa a dagitoy ket namaltrato, physical ken psychological discipline kas ti pannakadangran, pananginsulto ken dadduma pay.
Karaman kadagiti psychological abuse nga ikonkonsiderar ti United Nations Children’s Fund ket ti panangbugkaw kadagiti ubbing, panangawag kadakuada a sadot ken bobo wenno awan ti ammo na.
Kabayatanna, ti met physical abuse ket pakairamanan ti panagmalo, panagtungpa, panangriribok ken dadduma pay a wagas ti panangdangran kadagiti ubbing.
Manipod iti agarop halos 400 a milyon nga ubbing, 300 a milyon kadakuada ti maipagarop a nagpasar ti physical punishment.
Inbatad pay ti United Nations Children’s Fund a nupay ipawpawil ti corporal punishment kadagiti ubbing, agarop 500 million a milyon iti intero a lubong nga agtawen ti lima agpababa ket awan ti legal a proteksyon kontra kadagitoy.
Kinuna ni United Nations Children’s Fund Executive Director Catherine Russell, no dagiti ubbing ket kanayun nga agpaspasar ti physical wenno verbal abuse iti balay, wenno dagitoy ket mapapaidaman ti social ken emotional care manipod kadagiti nagannak da, maapektaran ti panangipateg da ti bukod da a bagi agingga iti panataeng da.
