LAOAG CITY – Umab-aboten iti 60 a milyon a pisos ti balor dagiti nadaddael gubuay ti panagtudtudona ditoy Ilocos Norte.
Segun ken ni Mr. Marcell Tabije, Local Disaster Risk Reduction Management Officer ti Provincial Resiliency Office, agdagup iti 56 a milyon lima gasut a ribu a pisos ti balor dagiti nadadael iti benneg ti infrastraktura.
Imbatadna a karaman ditoy dagiti nagdadael a paset ti provincial road, provincial bridge, barangay bridge, flood control river dike, small water impounding project wenno SWIP ken Sea Wall.
Inlawlawagna a basar iti naipadanon a report ti Provincial Agriculture Office, umab-abot iti tallo a milyon a pisos ti nadadael a pagay idinto a nasursuruk ngem 60 ribu a pisos iti High Value Commercial Crops.
Nupay kasta, imbatad ni Tabije a saan a nailawlawag no kasano ti perdisyon a nagpasaran dagiti nasao a mula dagiti mannalon ditoy probinsia.
Impalgakna a kalikagum ni Gob. Imee Marcos a maileppas ti Provincial Agriculture Office ti isaysayangkat da nga assessment kadagiti nadadael a mula dagiti mannalon iti kabiitan a panawen
Innayonna nga inbilin metten ti gobernador ti pannakatingiting dagiti mabalin a maitulong kadagiti naapektaran a mannalon ditoy probinsia.
