LAOAG CITY – Inrakurak ni Bombo International News Correspondent Rene Ballenas iti Estados Unidos a napunwanen dagiti naruay nga amerikano gapu iti agbaliw-baliw a desisyon ni President Donald Trump a makaapektar iti panagbiag dagiti umili.
Ibilang pay dagiti dadduma a residente ti Amerika a mapukpukawen ti simbeng ti panunot ni Trump gapu ta ado dagiti irakrakurak wenno isawsawang na a maikontra iti ar-aramiden na.
Kuna ni Ballenas nga uray dagiti pammilin ti korte ken ti naipalaon iti konstitusyon ket saan a tungtungpalen ni Trump.
Inyarig ni Ballenas ti panangpapaarestar latta ni President Trump kadagiti immigrants nga adda ti dokumento na ken uray dagiti permanent card holders, kasta met nga ado dagiti kaso na a maab-abak ngem saanna a tungtungpalen ti pammilin ti korte.
Innayon ni Ballenas nga ipagpagarop pay ni Trump nga isuna ti ari iti Amerika.
Inpakaammo ni Ballenas nga immuna a nangiyuswat ti nalawa a tignay protesta dagiti umili idiay Amerika idi Hunyo ita a tawen no sadinno nga umabot iti 5 a milyon dagiti nakipaset iti “No Kings Protest” idinto nga ita nga aldaw ket ngimmato iti pito a milyon a protesters.
Kabayatanna, kuna ni Ballenas a mabalin koma met a ma-impeach ni Presidente Trump ngem ti laeng problema ket majority iti kamara de representantes ken senado ket republicans.
