LAOAG CITY – Umaboten iti 69 a pagadalan iti Australian Capital Territory (ACT) ti napwersa a nagserra kalpasan ti pannakaikkat dagiti coloured play sand gapu iti risgo ti asbestos.
Basar iti report, dagiti naikkat a produkto a nakakitaan ti asbestos iti sumagmamano a samples ket inisyu ti Kmart.
Inbatad ti Australian Competition & Consumer Commission (ACCC) nga adda ti posibilidad na a ti asbestos ket agbalin nga airborne wenno malang-ab.
Inrakurak ni Australian Capital Territory Education Minister Yvette Berry a ti pannakainspeksyon dagiti pagadalan ket mabalin nga agpaot ti sumagmamano nga aldaw.
Malaksid iti Australia ket adda payen dagiti nagserra a pagadalan iti New Zealand gapu iti panagamak iti sand products.
Ti Asbestos ket nabayagen a maus-usar kadagiti materyales iti panagaramid kadagiti pasdek a mabalin a mangiparuk-at ti toxic fibres iti angin no mariribok wenno maiproseso a mabalin a makaapektar iti bara ken possible pay nga agtungpal iti cancer kalpasan ti sumagmamano a dekada.
Gapu iti daytoy, maipawilen ti panagangkat ken panaglako ti asbestos wenno aniaman a produkto nga addaan iti daytoy a kemikal iti Australia ken New Zealand.
