LAOAG CITY – Adda ti 46% dagiti pamilya a Pilipino iti intero a pagilyan wenno katukad ti 12.9 milyon a pamilya ti nangibaga a dagitoy ket marigrigat.
Daytoy ti rimuar iti 1st quarter 2024 survey a naiyuswat idi Marso babaen ti Social Weather Stations.
Manipod iti 12.9 milyon a pamilya, 1.7 milyon ti nangideklarar a dagitoy ket newly poor; 1.5 milyon ti usually poor; ken 9.7 milyon ti nangibaga a dagitoy ket kanayun a narigat ti panagbiag da.
Rimuar pay iti nasao a survey a 30% dagiti pamilya a Pilipino ti nangibaga nga adda da iti kategorya ti borderline poor idinto a 23% ti nangirakurak a saan da a marigrigat.
Nairekord ti kangatoan a self-rated poverty iti Visayas nga addaan ti 64%, sumaruno iti Mindanao a 56% idinto a ti Luzon ket 38%, ken iti Metro Manila ket 33%.
Nagun-od met ti Visayas ti kangatoan a porsyento dagiti pamilya a maibilang a marigrigat da basar iti ipapauneg da a taraon wenno maaw-awagan a food-poor families.
Nakairekord ti 46% ti Visayas idinto a 44% met iti Mindanao.
Ti nasao a resulta ket saan nga adayo iti resulta ti survey idi Disyembre 2023 no sadinno nga 47% met dagiti pamilya a Pilipino a nangibaga a dagitoy ket marigrigat.
