LAOAG CITY – Tiniliw ti napagtipon a puwersa ti PNP-Pasuquin ken ti Phil. Drug Enforcement Unit (PDEU) Region 1 ti maysa nga Out of School Yout (OSY) bayat ti anti illegal drug buy bust operations iti sanguanan ti Ilocos Norte Agriculture College (INAC) iti Bgy. 2 ti nasao nga ili.
Binigbig ni P/C/Inps. Roldan Suitos ti subject ti nasao nga operasyon a ni John Noel Gardoque agtawen ti 23 baro , cartaker ti maysa a piggery a masarakan iti nasao met a la a barangay.
Segun ken ni Suitos, maysa a kameng ti pulisya ti nagpammarang a gumatang iti marijuana nga agbalor iti 300 a pisos ket nagpositibo daytoy ket iti lugar a pagginawataan da ket iti sanaguanan ti nasao a pagadalan.
Kuna ni Suitos a malaksid iti naala iti suspek bayat ti panagginnatangan ket nakakita da pay iti bulto ti marijuana a naikabil iti ziplock nga agdagsen iti agarup maysa a kilo, maysa a pakete ti sigarilyo a mapapati a dagiti nagyan iti stick na ket marijuana ken dua a bala ti kalibre 45 a paltog a nakaikabil iti clutch bag.
Kuna na nga adda met dua a bulan a minanmanmananda ni Gardoque kasanguanan nga inoperasyonan da.
Inlawlawag na a ni Gardoque ket adda iti top 10 street level category iti ili ti Pasuquin ken supplier ti marijuana kadagiti estudyante iti nasao a pagadalan.
Saan met pay nalawag no paggapgapuan ti supply ni Gardoque a marijuana.
Kabayatn na, berberipikaren ti PNP-Pasuquin ti report nga uray panagibugaw kadagiti babbai ket ar-aramiden ni John Noel gardoque, ti suspek a natiliw babaen iti drug buy bust operation iti sanguanan ti INAC iti Bgy. 2 iti nasao nga ili.
Segun pay ken ni Suitios, adda da reports a dimmanon iti opisina da manipud kadagiti maseknan a nagannak nga adda dagiti annak da a babbai a masansan wenno saan ket ag-cutting classes da ket mapan da iti pigerry a banbantayan ni Gardoque.
Kabayatan na, nakigtot met ni Gardoque kalpasan a ginammatan da daytoy.
Kuna na nga awan ti ammo na iti ipabpabsol da kenkuana.
Kinuna na nga adda iti sango ti eskuwela gapu ta nagmeryenda da kalpasan a nagbilag da iti irik.
Inlawlawag na nga isu ti nagammatan da kalpasan nga isuna ket saan a nagtaray gapu ta ammo na nga awan ti basol na.
Saan met a makapagkumento dagiti nagganak ni Gardoque gapu ta maul-ulaw da iti pannakatiliw ti baro.
